Prinses Suzanne I

PRINSES SUZANNE I
EN PRINSGEMAAL BOB
VEURZEEN VAAN DE TITULARIA:
INGENIOSUS SPIRITUS SAXOPHONUS

Suzanne is gebore op 5 miert 1985 op de Sluizerbaank in Wolder en keump oet ’n ech greun nès. Zie is kleindochter vaan de lange Juul. Zie is de jongste in ’n gezin vaan drei kinder en heet twie awwer breurs. Zie is es 5 jaorig meidske begós bij de majoretten vaan de Greune en is heij 10 jaor bij gewees. Wie zie 7 wao is zie solfeige gaon lissen, gevolg door hobo. Heij mèt is zie doorgestroomp op 13 jaorige leeftied nao de groete herremenie oonder leiding vaan Pijpers. In 2006 is zie euvergestap vaan hobo nao tenor saxofoon en vaan 2003 tot 2010 is zie aoch lid gewees vaan d’n drumband.

Boe ?
Suzanne en Bob woene in Neerbeek, ’n dörp in de buurt vaan Beek. Zie höbbe ziech in 2008 liere kinne op stap in de la Cloche op de Vriethof. Leuk feitje: bij thoes vertèlle dat zie eemes leuk had liere kinne en bij doorvraoge bleek dat de aander aoch actief wao bij ’n vereiniging, bleek dat beide pa’s mekaar al koste via ’n jeugkamp veur meziek umdat zie dao venoet bestuurlijke functie betrokke waore gewees.
Suzanne en Bob höbbe twie keender, Carice vaan 7 en Guy vaan 5 en twie katte. Zie zien in september 2021 getrouwd nao 13 jaor same zien.
Bob speult bij de fanfare vaan Genhout hoorn, heer späölde iers trompöt bij de hermenie vaan Beek.
Suzanne häör sjoen awwers speule noe bij de Pie en Pow kapel.

Greune Meidskes
Bij de Greune heet Suzanne häör eige club vaan vriendinne, de “Greun meidskes”. Heij mèt heet zie al twie kier euvertuigend de Bling Bling Bye Bye show bij de Gruene gewonne.

Gelierd!
Suzanne heet es ierste SPH gestudeerd en is sinds 2016 wèrkzaam bij Mondriaan. In 2018 heet zie ’n Master Mental Health aofgerund aon de Universiteit vaan Mestreech. Heij nao is zie es psycholoog aon de slaag gegaange bij Mondriaan. In januari 2022 is zie ’n nuij opleiding begós veur gezondheidspsycholoog en studeert heij in juli 2024 in aof. Bob wèrk es proces engineer bij Bilfinger Tebodin in Elsloo.

Alaaf!!  Perfisia naomens alle Greune